Ханбогд, Гурвантэс, Хүрмэн, Цогтцэций сумын малчид нүүрсний тээвэр хийх гол шороон замуудыг энэ сарын 17-ны оройн 20.00 цагаас эхлэн хаасан байна. Тэд Өмнөговь аймгийн нутагт үйл ажиллагаа явуулж буй "Энержи ресурс", "Тавантолгой", "Монгол алт", "Чинхуа-Мак-Нарийн сухайт", "Өмнийн говийн элс", "Оюутолгой" компанийг эсэргүүцэж буй аж. Энэ талаар эх сурвалж хэлэхдээ "Нүүрсний гол тээвэр манай сумын нутаг дэвсгэрээр 86 км дайрч өнгөрдөг.

Уг нь засмал зам тавьсан ч хураамжтай гэсэн шалтгаанаар уул уурхайн хүнд даацын машины жолооч нар шороон замаар олон cap явлаа. Үүнээс үүдэж боссон тоос, талхлагдсан бэлчээр дунд байж чадахгүй гэж дөрвөн сумын малчид нийлж зам хаагаад байгаа. Тэд өөрсдийн машин, малаа авчирч нүүрс тээвэрлэх бүх замыг хаагаад байна.

Малчид өчигдөр компаниудын удирдлагуудад шаардлага хүргүүлнэ гэж байсан. Хариу өгөхөөс нааш замыг нээхгүй юм шиг байна билээ" гэлээ. Ерөнхийлөгч Ц.Элбэгдорж өчигдөр Цогтцэций, Ханбогд суманд ажиллаж, Тавантолгой, Оюутолгой компанийн үйл ажиллагаатай танилцахаар Өмнөговийг зорьсон юм. Зам хаасан малчид энэ сарын 21-нийг хүртэл Өмнөговьд ажиллах Ерөнхийлөгчид хандахаар төлөвлөжээ.

Д.Мягмаржаргал
Эх сурвалж: Монголын үнэн